蒸籠巴士

早兩日有環保團體進行左巴士車箱溫度調查，發現香港大部份巴士既車箱溫度偏低，情況最離譜既時候，車箱溫度仲得番16度。因此，環保團體就希望政府能夠立法，要求巴士車箱溫度維持係攝氏25.5度。

咁先唔好討論25.5度係唔係合理，亦都唔好討論一旦立法的話會唔會有執法困難。值得留意既係，其實而家行駛中既巴士，大部份都唔可以隨住室外環境同埋車箱溫度而作出調整﹗所以，好多時巴士乘客一多就開始熱，一少人就開始凍﹗

點解我地會知﹖因為涂謹申上年就叫過我地去量度巴士溫度﹕我地上年就特登量度左幾條巴士綠，發現大部份車箱溫度都超過26度；最誇張個架車，仲有成32度﹗係事後我地同新巴聯絡，新巴就表示所有車輛都只可以係每朝出廠時預設於某一溫度；巴士每朝出廠後，司機就只可以調較風力，車箱溫度就唔可以作任何調較﹗

相比之下，我地就知道九巴近年都引入左一款新既巴士，該款巴士就有自動恆溫系統，可以隨時調較溫度。不過，該款巴士到而家都只係得百多部。所以，而家就算巴士太凍或者因為乘客太多而變成蒸籠，咁司機都冇辨法喇。

所以，涂謹申雖然都好希望巴士公司可以為環保為乘客健康著想，盡量將車箱溫度調較到「合理水評」。不過，係而家既技術限制之下，涂謹申都覺得應該預設涼快小小，好過架巴士一人多就變成蒸籠喎 (咁涼快小小既意思就緊唔係低到得16度個種喇)。又至於幾多度先係「合理水評」，就好難講喇。

丫，最後，大家見到上面幅相個個靚仔既﹖幅相就係05年量度巴士溫度時所拍攝；大家好眼力既話，都應該睇到個溫度計表示住28度架﹗而大家亦都可以click下幅相，睇下我地個次既調查報告。